LI NOVI PRUCISSIONI

A Girgenti: chi 'mprissioni !
Vitti aéri 'mprucissioni
a lu novu senaturi
chi parla nostru Signuri
chi trasìa a Gerusalemmi
d'oru càrricu e di gemmi !
C'era a ciancu Cicciu Vagna
chi c'iu bbeni la campagna
e fu fattu debbutatu
e rirìa tuttu 'stasiatu !
Comu du' carrabbineri
ch'a cavaddu od a l'apperi
sunnu 'ncoppia a li quatrivi;
unu leggi e l'autru scrivi,
accussì 'sta coppia eletta
leggi e scrivi, oppuru addetta !
Soccu scrivi? Scrivi assegni;
nni staccau cchiù di tri gregni !
Soccu leggi ? 'Mputazzioni,
carti di cumparizzioni,
ma 'ncalera nun ci va;
s'accattau l'immunità!