E veni Carnevali
si rinchinu li strati
e puro li viali
di genti mascarati.
'Un c'è nicu né ranni
chi nna ' ddi certi jorna
'un cancia li so' panni
oppuro li so' corna !
Ma jò mi staiu ricennu
e dicu puro a vui :
« Soccu stannu facennu
chiddi di la Ppidui;
l'eterni mascarati
cu capucciu e falari
dunni sunnu ammucciati
chi si nn' erro oltremari ?
O li sdisanurati
ti stannu a traficari ?
'Unn'è lu trentatrì
da loggia Giustiniani
vistutu d'accussi
chi fa scantari i cani
fussi 'na bedda mascara
di putilla primiari
cchiù di chidda ascara
c'un saccu di rinari ! »
Ma nna sti certi jorna
chi si 'nfacciala ognunu
l'avvocatu 'Unciagghiorna
tantu pi dirini unu
la mascara la lassa
e nesci strati, strati
'nmezzu la granni massa
di genti mascarati
sulu a facci scuverta :
« Chi su' 'sti tissariati ?
'Unn esti genti sperta !
La mascara la portu
pi farimi l'affari
pomai pi lu diportu
mi vogghiu mascarari !
Chi vuci, chi baccanu
chi cririnu di fari ?
Picciotti emucci chianu
lassatimi passari !
Socch'è 'sta fitinzia ?
'Unn esti cosa seria
la mascara pi mia,
sangu di la miseria,
purtalla a Carnevali
'nsemmula a la gran massa
di genti duzzinali ? !
'Un viu l'ura chi passa
pi mettimi 'u falari
e capucciu e cumpassa
àutru chi streghi e mari !
Nna loggia ti la spassi
megghiu chi ca cummari
chi supra di li massi
mi piaci cumannari !
E poi chi cumpagnia :
c'esti lu raggiuneri
chi mi fa simpatia
e puru lu 'ncigneri
e genti di cultura
pirsuni veru seri;
nutara e prufissura !
Allura ti 'nfacciali
cu li pirsuni giusti,
ti metti lu falari
e lu putiri gusti :
cu si pigghia l'appartu,
cu lu sutta guvernu
e si c'è quarchi scartu
ci 'u ramu o' patreternu !
|
e-mail -
