ELEGGIA PI LI MORTI DI MAZZARA

'Sti picciotti assummati di lu mari
nna la vara cumposti: chi pietà!
L'anticu luttu di li marinari
ritorna ancora nna la me' cità !
Di li tempi di quannu cu li veli
sabballuttuliati di cca e di dda
sutta la furia di nnimici celi,
armati di curaggiu e vuluntà
p'ascippari a lu mari quarchi sarda
o quarchi scurmu oppuru la nunnata
s'avvinturava 'dda genti vagghiarda
e di lu celu la granni navata
taliavanu di notti e 'na prijera
ruci acchianava a la vorta stiddiata
di divuzzioni d'un'arma sincera
e cu tuttu lu cori addidicata !
Ma 'na vota luttavi cu lu mari
cu li timpesti e la furia du ventu,
s'era ristinu chiddu d'annijari
idd'era risurtatu d'un purtentu !
Ora si mori sulu pi dinari
pi l'avarizzia di quarchi armaturi
e puru 'a morti addivintau vulgari
'n eventu griggiu chinu di squalluri !