Ogni vota chi talìu st'arvuliddu
mi veni di davanzi lu passatu,
di quannu, ch'era nicu, picciriddu
e lu taliàva comu 'n allampatu.
Me patruzzu lu cunzava, sempri iddu,
la sira, dopu ch'avìamu manciatu;
puru ora, ch'è ridottu vecchiuliddu,
lu conza sempri ma nun è taliàtu.
Nun ci foru rigali a li so' peri
ma quannu ch'era lestu, a l'addumari,
avìamu 'n menti sulu stu pinzeri:
di villu finarmenti funziunari.
Sapiti? Tra li tanti so' misteri,
st'arvulu, appena si mittìa a lampiàri,
era capaci cu li so' maneri
a mia e me frati fàrini 'ncantari.
Lu talìu dopu 'u tempu ch'â passatu,
d'acciacchi n'àvi, certu, puru iddu;
d'un ciancu si prisenta cchiù aggiuccatu,
lampìa sempri ma va cchiù lentuliddu.
Me patruzzu, ch'ogni annu l'â cunzatu,
ci va appressu, oramai è anzianuliddu;
un pocu curvu, malucumminatu,
ma 'un passa Natali senza st'arvuliddu.
declamano: Riccardo Santoro - Ilenia Cammareri - Manuel Cosenza
Autore: Nino Barone
|
NOTA BIOGRAFICA
Nino Barone
Nino Barone nasce ad Erice Casa Santa nel 1972 ma vive a Trapani con la moglie Rita ed i figli Mario e Flavio.
Impiegato presso la Fondazione Auxilium, svolge mansione di assistente-educatore.
Nutre particolare interesse per la storia, la letteratura e le tradizioni popolari.
Non a caso è parte attiva nella celebre "Processione dei Misteri" che si svolge il Venerdì Santo a Trapani.
Sin da bambino manifesta una spiccata sensibilità poetica che ha coltivato e maturato negli anni.
Dal 2005 ha partecipato a svariati concorsi, anche fuori dalla Sicilia, ottenendo ottimi risultati.
Ha pubblicato nel 2006 la sua prima raccolta di poesia dialettale dal titolo "'A stratuzza" ed è presente in diverse antologie.
|
e-mail -
redazione@trapaninostra.it
