Vito Blunda




Archivio culturale di Trapani e della sua provincia
VITO BLUNDA - poeta, compositore, musicista trapanese

Un postu luntanu

Veni cu mia, dammi la manu
ti vogghiu purtari nna un postu luntanu,
unni li stiddi fannu chiù luci...
e nun si senti né scusci, né vuci.

Unni li sordi 'un servinu a nenti
e a tutti l'uri si ncontra la genti,
nuddu chi soffri e nenti duttura...
picchì la paci è mpiratura.

E nta stu postu ch'è tantu luntanu
vannu d'accordu e si strincin'a manu,
c'è na surgiva unni assumma l'amuri...
chi trasi 'n pettu e si nfila ntô cori.

Jòcanu nzèmmula picciotti e vecchi,
sunnu paraggi davanti a li specchi,
ognunu duna tuttu 'u so beni...
sùranu meli, senza vileni.

Si po manciari di notti e di jornu
lu pani friscu è sempri ntô furnu,
tutti ci stannu cu cuntintizza...
nuddu chi risica e nenti s'appizza.

Cu è ci abbita avi tanti culura,
'un si travagghia e mancu si sura.
Veni cu mia e 'un ti scantari...
chi 'n paradisu ti vogghiu purtari.

Vito Blunda 13/10/2007


E-mail e-mail - redazione@trapaninostra.it