Puru si 'un n''u vulissi... l'haju a fari,
mi pigghiu un pezz'i carta e già pinzannu,
m'arriva na cartedda di palori
chi jò, senza mpirugghi, vaiu scrivennu.

Mi sentu comu l'acqua... a granni frusciu,
c''a terra nostra voli abbivirari
e staju chiù megghiu quannu poi finisciu,
s''i me palori vi fannu scialari.

Mi sentu... comu na machina spasciata,
chi 'un voli nuddu, ma cu camina a peri,
vulennu, si po fari na passiata

s'iddu s'assetta e ascuta 'i me' pinzeri.
Fattu lu viaggiu si fa na pinzata
e mi po diri... ni viremu arreri.

Vito Blunda 23/092007