Nascennu nta la parti di lu Munti
grapivi l'occhi na la Via Vurtaggiu;
facennu n''a me testa quattru cunti...
picca fu 'u ntressu e tantu lu dammaggiu.

Sap'iddu si a la fini cumminia
nasciri a l'âtra banna di la strata:
a li muntisi chiù 'un appartinia...
stava chi trapanisi a dda latata.

D''u Munti, 'un a sintia la riscinnenza
cu 'n tuttu chi ci vinni 'u me sbinnonnu,
c"u tempu addivintau "troffa di scenza"...
li me parenti, dda a Salemi, stannu.

Si nn'jeru cinquant'anni lisci lisci
e nun s'ha sciotu stu me granni arcanu:
'un sugnu carni e mancu sugnu pisci...
mi sentu, a si e no, mezzu cristianu.

'I Trapanisi hannu a Santu Libertu,
'a Loggia, Turrignì, la Culummara,
Ra Nova, Piscaria e 'nu granni Portu...
Curaddu, li Mulini e i Salinara.

'U Munti avi 'a Matrici e du' casteddi
e troppu casi chiusi o abbannunati,
lu Baliu, li Stratuzzi, li Vaneddi...
ma nun ci abbita nuddu, sunn'è stati.

Pi sta custioni 'u mpignu va criscennu
pi dari a tutti dui stissa mpurtanza,
spiramu chi ci stannu arriniscennu...
ncucchiannu d'ognidunu la mpurtanza.

Veni 'a caruta puru na dumanna:
Quann'è chi po canciari 'a situazioni?
Ristari ca o jiri a l'âtra banna?...
La viu funciuta: 'un c'è soluzioni!