Vito Blunda


Archivio culturale di Trapani e della sua provincia
VITO BLUNDA - poeta, compositore, musicista trapanese

L'avvertimentu d''a Culummara

'A Culummara è dda, pusata a mari
chi ni talìa e pari c'addumanna:
A cu' aspittati? Chi m'hâ sdirrupari?...
É chissa la me fini? Sta cunnanna?

Pi fari sta gran sorti di casteddu
ci travagghiaru genti c''u gran sennu,
e cu è chi mi talia mi dici "beddu"...
piccatu chi a pizzudda st'aiu carennu.

Ma ci pinsati vui quannu sirvia
pi addifenniri sta granni citati,
picchì quannu 'u nimicu ci vinia...
di cca partianu focu e cannunati.

Cu 'n tuttu chi ci vinniru 'i rignanti
pi sentisi chiù megghiu cunnuttati,
stu locu retti troppu patimenti...
a chiddi chi ci foru carzarati.

Ah! Si sti petri putissiru parlari
'sà quantu cosi avissimu a sintiri:
lu sbattiri ntê scogghi di lu mari...
chi stenti e 'a sulità fannu nfuddiri.

Si 'un mi vuliti chiù nta pruspittiva
e mancu nte ritratti chi mi fannu,
pozzu turnari â furma primitiva...
ma è tutta vostra 'a curpa di stu dannu.

Vito Blunda 26.04.2009


E-mail e-mail - redazione@trapaninostra.it