Un jornu na Riggina sfacinnata
girava dintra 'i stanzi d''u palazzu;
circava, pi passari la jurnata,
quatri, specchi e puru... quarchi arazzu.

A un certu puntu l'occhi li pusava...
'n un quatru dunni na granni ballirina,
mentri firriava, 'a vesta si ci aisava
e 'n mezz'i cosci... avia n'avunciatina.

 vista di ddu bozzu, la signura,
nna la so testa misi a macinari,
sta sfirnicia ci l'appi chiù di n'ura
e ô Re, di cursa, vosi jirlu a cuntari

"Mi piacissi nzignarimi a ballari"
ci dissi la Riggina ô vecchiu Re,
"picchì accussì ti pozzu arricriari
cu l'abbiti di sita e 'i pirulè"

'U Re, ch'era chiù vecchiu di trint'anni,
a volu l'affirrau sta gran pinzata
picchì spirava chi pi so malanni
putia giuvari 'a troffa... da "nzalata".

Ci arrispunniu c''a cosa putia falla
e nun truvava propriu nuddu malu;
villa vulari comu na farfalla...
a iddu putia dari... tantu scialu.

P"u ntentu, un gran maestru si circau,
ma a lu munarca nuddu ci piacia,
'a soluzioni idda l'attruvau:
fici arrivari a... l'omu chi vulia.

La gran signura tuttu organizzau
e prisintau a na sorti di picciotta,
lu Re, sulu p''u scrupulu 'a pruvau,
ci fici fari 'u saggiu...nta na botta.

Truccatu a tipu ronna di città,
fici l'abballu e 'n terra 'un ci pusava,
'u vecchiu dissi: bona chissa cca!
e di nsignari 'a mogghi...'a ncarricava.

Chiddu, era veru un granni ballirinu,
siccu e smaciatu comu na jaddina,
ma era puru l'amicu supraffinu:
l'amanti nutricatu... d''a Riggina.

'A "mastra" tutti 'i jorna travagghiava
avennu puru alloggiu nto palazzu,
cu st'omu la Riggina ncurniciava
lu Re, picchì 'ncuranti...'un vitti 'u bozzu.

C''u sapi si di niatri c'è quarcunu,
chi cu sta storia penza a cosi seri
e forsi è megghiu, chi ccussì ognidunu,
st'attentu, cu cu' abballa... so moggheri!