LAMENTU D’UN VECCHIU VIDDANU

‘Nsunnatu ancora e cu lu passu moddu
si susìa me ziu, l’occhi a pampinedda,
mittìa la fauci e lu zappuni ‘n coddu,
nta ‘u zàinu du’ alivi e na vostedda.

A raccamari la so terra si ni jia
e la vagnava cu li so’ sururi
mentri l’ultima stidda scumpària,
cuntentu ringraziava lu Signuri.

‘Nveci, ora, chi addivintàu vicchiareddu
spissu, iddu, agghiutti amaru e poi tistìa
aggiustànnusi ogni tantu lu cappeddu
c’‘u sangu chi nta ‘i vini quarquarìa!

E dintra e fora pinìa e si lamenta
prima di mia mòrsiru: lu zappuni,
la fàuci, lu furcali, la trarenta
e tanti àutri cosi già jittati agnuni.

St’attrezzi novi su’ sufisticati
e lu travagghiu certu alliggirisci
però si l’occhi ‘un teni sbarrachiati
la vita tua nun sai comu finisci.

Quantu vileni a st’epuca muderna,
amaru è lu fruttu chi arricogghi
‘n celu si forma na funnuta jsterna
e cca si mori comu sicchi fogghi

A chissu nun ci pensa l’omu novu:
chianci ‘i cunsiguenzi ‘u chiù nicu chiovu.