A TRAPANI

Di fàuci pì mètiri ‘u furmentu
è fatta la to furma assai giniali,
araciu e forti t’accarizza ‘u ventu
quannu è sciroccu oppuru è maistrali.

La luna accumpagnata cu li stiddi
ti duna luci e mai chi t’abbannuna,
s’annàcanu cu l’unni ‘i picciriddi
e dòrminu, nuzzenti, cuntintuna.

Lu suli ogni matina chi ti vasa,
lu bagnu ti fa ‘u mari e ti ‘mprufuma;
si gràpinu ‘i finestri d’ogni casa,
s’asciuca ‘u sali comu bianca scuma.

Cantanu l’acidduzzi a la marina,
salutanu cuntenti ‘i marinari;
li ciuri scutulannu l’acquazzina
baràgghianu spicchiànnusi nta ‘u mari.