LU CARRITTEDDU

Davanti ‘a sala di divertimenti,
pusatu a bedda vista a primu affacciu,
tistimuniannu ‘na vita di stenti
un carritteddu c’era e un dava ‘mpacciu.

Cu ‘i vrazza mezzi rutti e camuluti,
avìa spadderi tutti disignati;
rapprisintava tempi ormai finuti
e li picciotti, d’iddu, ‘ntusiasmati.

Quantu matini ‘nsemi a lu patruni
stu carritteddu senza mai sustari,
c’‘u friddu, càuru, ‘mmernu o di staciuni,

purtava ziti puru a maritari,
cu sciccareddu longu lu stratuni
sunannu la cianciàna a l’arbiggiari.