LU CUMPLIANNU

Jò pensu sempri cu la nustalgìa
lu vintinovi di tant’anni fa;
lu cumpliannu di la matri mia,
di quannu, nica, ci dicia: “mamà!”

Tutti li me’ capricci accuntintavi
dànnumi di cuntinu lu to affetu;
ogni cuntrarietà m’assistimavi
e la me naca, spissu, lu to pettu.

Novanta su’ ‘i cannili d’astutari;
puru s’‘a testa nun è tutta bianca,
sentu lu cori d’‘a pena attrassari

pirchì si junta vicchiaredda e stanca.
A lu futuru megghiu un ci pinsari,
già sacciu chi ‘u to ciatu assai mi manca.