PI TIA SPINNU

Passannu spissu di dda “granni” porta,
mettu a taliari cu pena ‘a to casa,
su’ tanti l’anni, ormai, chi si già morta,
ma lu ricordu torna e poi mi vasa.

E mi ritrovu, nonna, picciridda
cu l’occhi a dd’arvuliddi, chi facia?
Nun aspittava suli o quarchi stidda
ma jò aspittava sulamenti a tia!

E quannu chi arrivavi ‘n tempu ‘n nenti
cu passu longu e ‘u fazzulettu ‘n testa,
nta lu me cori c’era, finalmenti,
‘na vera gioia, c’era ‘na gran festa!

E quantu voti ‘ncontru ti vinìa
mentri, chi lesta tu t’avvicinavi,
quannu jò ti chiamava: “nonna mia!”
emuziunata forti m’abbrazzavi.

Ora tu dormi nta ddu friddu lettu
e jò mi sentu già ‘na vicchiaredda,
lassasti nta ‘u me cori granni affettu
e sempri, pi tia spinnu, nonna bedda.