CUPIDU

Lu cori chi diventa ‘nnamuratu
si senti tuppuliari forti ‘u pettu;
ci leva stu pinseri, puru ‘u ciatu
e pari aviri spini dintra ‘u lettu.

Cu forza si lu strinci lu cuscinu,
aspetta chi s’astùtanu li stiddi,
chi spunta l’arba, prestu lu matinu,
mentri lu cori svampa e fa faiddi.

Pirsinu ‘u vecchiu nun si senti stancu,
vulissi, certu, jorna, d’allungari,
tinennu lu so amuri sempri a ‘u ciancu,
a Cupidu nun fa chi ringraziari.

L’amuri, sta catina fatta d’oru,
chi letu letu ‘u cori custudisci,
è di la nostra vita lu tisoru,
lu munnu, senza amuri, scumparisci.