SPIRANZA

Dintra stu granni “jardinu”,
chinu di rosi e di spini,
la vita joca c’‘u nostru distinu.
Quannu ci pari cogghi spuntuna
ammucciuni ni jinchi ‘u cuscinu,
c’‘u lustru d’‘u suli o d’‘a luna.
E poi assumma comu ‘u malutempu
quannu, d’impruvvisu oscura ‘u celu,
accussì assumma la pena
chi smovi ‘i ricordi
‘ncuddati nta la menti.
Ed è dulurusu chiantu
chi curri a lavina,
vagna occhi e facci
spirciannu lu pettu,
ma nun l’astuta lu focu
chi jardi nta ‘u cori,
resta sempri a faidda
chi cuva e nun mori.
Poi senti ‘na vuci, araciu ti chiama,
cu manu di nùvula lenta accarizza
dda granni firita,
la fedi la ‘ntrizza
cu duci paroli e ciatu d’amuri.
La vucca si grapi
a un surrisu chi crisci,
l’occhiu ora, asciuttu, talìa
‘u ciuri chi spunta,
‘u picciriddu chi nasci,
cuntinua la vita puru si spissu trarisci.
C’è sempri dda stidda
chi n’allustra la via; duna forza, spiranza,
puru si bon pisu
nun fa chiù la valanza.
Ddu postu vacanti
sulu “iddu” accuppuna
stu virdi filiddu
chi a nuddu abbannuna.