LA TILIVISIONI

Sta tilivisioni pi niatri è na gran cosa,
la pussiremu tutti, casa pi casa,
e quannu si sfascia quasi un si pò stari,
e perciò si porta subbito a cunzari.
A idda semu tanti addiccati
chi ni la viremu puru curcati;
E pi causa di sta meravigghia
nun c’è cchiu dialugu nfamigghia.
La sira essennu ntavula assittati
dicu sempri: “Zittitivi e ascutati”.
Ma è la solita storia stu tiligiurnali
chi a sintillu ni fa sentiri mali,
parla sempri di mafia e di drucati
di sequestri e di genti ammazzati,
e siccomu è l’ura di manciari
inveci di agghiuttiri ni veni di lanzari.
Votu canali e trovu u Parlamentu
ma di soccu dicinu s’npigghia u ventu.
Arraggiunannu da sira a la matina
ni portanu a pocu a pocu a la ruvina.
Allura canciu pi viriri quarcosa di bellu
ma trovu sulu pistoli e spugghiarellu.
Mi cala lu sonnu e stringiu li denti
e mi vaiu a curcu senz’aviri vistu nenti.
Ma allura: picchì pagu sta tassa?
La pagu sulu pi viriri la farsa.