L’ASSALTU DI LI LICCAREDDI

Lu suli appena affaccia a la matina
cu gran primura leggi lu giurnali,
tantu sdignatu dici: Chi ruvina!
Comu ci su’ tutti sti criminali?
E tu mari nun viri, nun fai nenti?
Astuta chistu focu di la terra,
sti vili addumannanu tangenti,
nta li casati misiru la verra.
Ah! comu sbutuliau chistu munnu!
L’omu etta li spini comu lu rizzu
cu facci tosta si firria ntunnu
e comu nenti fa pagari u pizzu.
Nta stu giru, misi a malaffari,
sìminanu ogni ghiornu sulu morti
pi ghìnchisi li banchi di rinari
ruvinannu lu futuru di picciotti.
Pi fari chi? Pi farisi li villini?
Pi farisi ntra iddi l’abbuffati?
Sucanu sangu di poviri mischini
e nun penzanu a ddi sbarri firriati.
E na ddu scuru senza u me’ caluri
sbrama lu cori d’ogni carciaratu,
nta lu pettu ci veni un gran duluri
cchiù nun mi viri si nun ha scuntatu.
Povira matri Italia ruvinata!
La tò bannera cchiù nun canta o vento,
di li caini nto cori pugnalata,
e vai murennu a passu, a passu lentu.