LU PIANINU

Quanta armunia c’era nta li strati
quannu lu pianinu facia li sunati,
dunni passava c’era l’alligria,
ricordu ddi tempi cu nustargia.
Era un carrettinu arriccamatu
di ciuri beddi e cunn’a rrota allatu,

firriata ntunnu comu un mulineddu
tiratu a mmanu da un mischineddu.
Cu ddu sonu miludiusu e finu
pi li strati girava lu pianinu;
quannu passava e lu sintìa sunari
ognunu ci ittava li dinari

e a lu me cori s’addumava un focu
chi tenniru s’innia a ogni locu.
Ogni matina cu sta miludia
leta minn’ia a la scola mia;
stu pianinu facia beddi sunati
svampava l’arma di l’innamurati.

Comu ogni cosa bedda, fu sfurtunatu,
ormai ntra nn’agnuni è durvicatu,
li picciotti d’oggi nun lu sentinu cchiù,
resta un ricordu di lu tempu chi fu.