'Ntra li famigghi antichi si usava
Lu stili e lu sistema militari.
Li liggi sulu u Patri l'addittava
E tutta la famigghia aviascutari.
Nun c'era nuddu chi si runguliava
Quasi pi nnenti si putia abbuscari.
Lu Frati ranni poi carti pigghiava
Mittennu a li chiù nichi accumannari.
Jò sennu lu chiù nicu pi sfurtuna
Di tutti desci vinni cumanna tu.
E capitannu li gran timpuluna
Puru a li soru stava assuggittatu.
Me Matri 'ntra carizzi e 'ntra vasuna
Mi lusingava e ghiò pigghiava sciatu
Pinsannu poi d'aviri la furtuna
Di cumannari doppu maritatu.
Poi doppu ranni, vitti a na picciotta
Chi mi taliava risulenti e nzutta.
E ghiò m'innammurai sutta la botta
Mi parsi a tutti banni bedda tutta.
Si maritamu; e allura nda la lotta
Successi a mia d'ingagghiari sutta
Ed allura jò sturdutu di l'abbotta
Mi misi ntesta mettimilla sutta.
Pero successi i tempi chi cangiaru
Tantu chi lu Guvernu e lu Papatu
Misiru liggi e li privileggiaru
Tantu chi l'omu vinni spudistatu
Allura stu purganti è troppu amaru
Tutta la vita a stari cumannatu
Fisci la prova a fari u paru e sparu
Ma umm'arrinesci d'essiri ascutatu.
Canciai sistema a chiacchiari e carizzi,
Vulennu troppu beni sta mugghieri
M'agghiuttu tuttu puru li munnizzi
C'ogni momentu quasi mi succeri.
E li carni mi li sentu rizzi rizzi
Virennu chiddu chi c'è peri peri,
Ci portu tuttu, i sciuri e li biddizzi
Lu latti di l'asceddu e li pinzeri.
Ma nun c'è forma umana d'arrivari
D'aviri sta furtuna stu piaciri
Di villa a cosi giusti arraggiunari
E pi na vota fari u sò duviri.
Custrettu sugnu allura a cunfissari
Chi sta spiranza mia vitti svaniri
Cu 'mmarrinesci mai di cumannari
Macari nzonnu lu vurrissi aviri.
Però cunsigghiu a tutti suppurtari
D'aviri puru tinta na mugghieri.
C'è un proverbiu disci «cu è chi cari
S'unnavi aiutu un si rimetti mperi»
E allura un omu vecchiu chi pò fari
Sunn'avi mangu un corcu d'mugghieri
Comu puru na schetta, nun pò stari
Chi campa di baragghi e cu pinseri.
E allura è megghiu suttamisu stari
E a li bisogni aviri un certu aiutu
Ci sù momenti chi ti fà scurdari
Tutti li peni amari ndu minutu,
Ci su momenti chi ti fa arrivari
Pi la lirizza addiri aiutu aiutu
E allura lassa iri lassa fari
L'interessanti è unn'essiri curnutu.
|