Di tutti è certu iddu 'u chiù mpurtanti,
picchì rinasci ogni annu 'u Bammineddu,
dopu d'Ammaculata e tutti Santi...
dicemmaru è lu misi ch'è chiù beddu.

Ma quannu 'u vinticincu s'avvicina
c'è genti c'addiventa chiù cunfusa,
pi contru di pinzari a la Nuvina...
pi l'anzia si fa troppu stufficusa.

'A prima custioni è soccu havi a rialari,
p'aviri di l'amici 'anticchia affettu;
'u risturanti dunni jiri a manciari...
e 'a sira poi abballari 'n duppiu pettu.

Pû pranzu di lu jornu di Natali:
mennuli e pataticchi cu l'alivi,
vippiti priparati nê bucali...
rosolii novi comu appiritivi!

Doppu, si principia chî cassateddi,
busiati, carni e pisci c''a nzalata,
cazzusi e vinu di li vutticeddi...
surbettu, frutta, cafè e la cassata.

È veru chi sta festa ntinnarisci,
'u cori nostru vuncia e pari vutti,
lu Signuruzzu, pi la cruci nasci...
e di cu è scarsu, ognunu si nni futti!

Vito Blunda 06/11/2007