Un jornu, un beddu giuvani d"a Ficu scinniu 'n cità 'unn'è ch'era ammitatu,
ô matrimoniu 'i Cola Filiricu, vitti na ronna chi lu lassau ntrunatu.
'U cori ci battia comu un tammuru e a iddu chi la musica piacia,
comu un jattuzzu ô suli di jinnaru, si ntisi misu dintra na puisia.

Nta la so testa cuminciau 'u sirvizzu, pi comu sta picciotta cunquistari,
'a notti 'a facia jornu, paria un pazzu, senza di idda 'un putia campari.
Sta smanciacina forti ci sirviu, pi farisi curaggiu e pi parlari
c"a 'zà Ciccina e a idda 'un ci spiaciu, dicennucci però chi avia aspittari.

Di jorna ni passaru na dicina, pi lu cunsurtu fra parenti fari
e fu gran festa quannu Giuannina, ci dissi: A tia mi vogghiu maritari!
Quannu sti tri paroli Cicciu ntisi, fu accuppunatu di tanti cuntintizzi,

picchì Giuannina a iddu si prumisi, cu tutti 'i so virtù e li biddizzi.
Si fici 'u spusaliziu e grazi a Diu, sti giuvini scanzaru 'i cannunati
picchì puru la "verra" ci tintau a spartiri sti aceddi nnammurati.

Quannu d''a prigiunia Cicciu turnau, truvau a Terina e tutt'a so famigghia,
allura pinsau bonu e ci pruvau, m''a sorti vosi ch'era n'âtra figghia.
'U cori di Giuannina canuscia socch'è chi a Cicciu ci facia piaciri,
cu tutti li prijeri chi sapia, assistimau la cosa c'havia a fari.

Lu novi ottobbri di lu cinquantunu, nasciu lu ciuri chiù disidiratu,
difatti, ringraziannu lu Divinu, 'u masculiddu biunnu avia arrivatu.
La nascita d''u figghiu ci sirvia, pi dari forza a tutta 'a discinnenza,
lu nomi d'iddu accussi putia, essicci puru doppu 'a so prisenza.

Ma lu distinu fu assai crudeli, cu Giuannina prima e poi cu Cicciu,
'u cori d'iddi era un pezz'i meli, 'a mala sorti si livau un capricciu.
Li figghi li chianceru pi tant'anni, sintennu ancora soccu 'a genti cunta,
e stu prufumu chi di 'n celu scinni, è fruttu di Giuannina e Cicciu Brunna.

Vito Blunda 1998