LA PICCIUTTANZA

La picciuttanza nun si po scurdari,
si vota e svota spissu nta la menti
e li ricordi sunnu duci e chiari
ma si trovanu cu li gammi lenti.

E stu pinseri assumma a tutti l’uri,
ni lassa sulu quannu chi si mori;
comu la matri, comu ‘u primu amuri,
n’arresta arrampicatu dintra ‘u cori.

Abbasta chi funziona ‘u ciriveddu
e l’arma chi t’arresta giuvanili,
ti viri nicu, puru picciutteddu,

chi jochi cu ‘i buttuna nta ‘i sidili.
Svulazzi pi li strati comu aceddu,
letu, cuntentu e senza nuddu stili.