PRUMISSA

Matri, jò sugnu ancora picciriddu
e certamenti nicu è lu me cori,
jò satu e curru comu fa ‘n ariddu
e ‘i to’ pinseri ‘un fazzu stari sori.

Tu matri, si nta ‘u scuru, canniledda
chi allustra notti e jornu la me via,
a la me fami è pronta na vostedda
e nun mi scantu quannu si cu mia.

Nenti ti dugnu e tinturìi accuppuni
ma quannu sugnu granni ti prumettu:
“O mamma, tu, chi sempri mi pirduni,
tutti li jorna, strìnciti a ‘u me’ pettu!”

Pirchì, tu vecchia, torni picciridda,
dintra lu cori lassu na fissura,
t’accattu li gilati e na pupidda,
ti staiu vicinu, sempri, ad ogni ura.