PI TUTTI ‘NA NACA

Nta ‘u filu, nta ‘u ramu, s’annaca ‘u cardiddu,
ci pensa lu ventu chi canta cu iddu;
puru li pisci si fannu l’annacati,
quannu nta ‘u mari ci su’‘i marraggiati.
L’attuciu a lu suli joca ca matri,
la serpa talìa di ‘n mezzu li petri,
st’armali sinceri su’ leti cu nenti.
E Diu chi viri, chi viri e chi senti,
tistiannu l’appatta a dd’armalu parlanti;
lu priviligiatu, lu chiù binistanti,
tuttu pusseri ma è sempri scuntenti.
Iddu li scorda ddi saggi paroli,
sapiti, chiù avi pritenni, chiù voli;
arrobba, si droga, ammazza ‘i so’ frati,
‘nveci d’avilli vicinu abbrazzati;
quannu a la fini va a trova ‘i parenti,
è tardu, nun lu sapi e s’attrova cu nenti.