LA RIVINCITA

Ddu locu chi ni fici lacrimari
ora addivintàu postu di ristoru
e darrè dda finestra ‘n facci ‘u mari
‘n coddu tinivi ‘u primu to tisoru.

Sapissi ‘u cori comu mi battìa,
pirsinu sintìa lu to tristi cantu
e ‘u to duluri granni, matri mia,
la nenìa chi accuppunava ‘u me’ chiantu.

Ddu “‘nfami” chi ni purtau a Lazzarettu,
a bedda vista misi un grossu puddu,
dintra dda stanza tu strincivi a ‘u pettu
stu piru sfattu senza piricuddu…

E mi ritrovu cca dopu tant’anni
cu genti ‘nnamurati di puisia,
lu “vili” ‘un parla, è mutu, ‘i me’ malanni
si li ricorda ma nun pipitìa.

E mentri ascutu attenta ‘i prufissura,
sta misu nta ‘n agnuni chi talìa
e la so facci, viu, chi si sculura
pirchì nun potti ruvinari a mia.