L’INVINZIONI DI VALURI
(per l’anno del disabile)

Truvannumi pi strata l’àutru aeri,
‘na machina virìa sustari a latu,
fu tannu chi mi vinni stu pinseri:
lu soccu vitti, sì, m’à ‘mprissiunatu.

‘Na picciuttedda scinni c’‘u vastuni,
bedda, eleganti e cu lu passu lentu,
cu dignità trasìu nta ddu purtuni
nun dimustrannu nè fatica o stentu.

E mentri chi taliàva, li pinseri
vularu vardacasu a li scinziati
chi ‘nventanu, chi trovanu ‘i maneri
p’alliggiriri tutti li sfurzati!

Pi niàutri, “li ritagghi d’‘a natura”
sturiàru bonu sti menti prigiati,
cu na particulari attrezzatura,
ni fannu puru currìri p’‘i strati.

Dintra ‘i màchini semu veru leti
e nun pinsamu, certu, a lu difettu,
cu l’àutri s’ammiscamu beddi queti
e ‘un punci forti ‘a spina nta lu pettu.