LA REGATA

Sittembri finìa già li so’ jurnati
avennu ‘a porta misa a vanidduzza,
priatu salutava ‘a bedda estati
mentri lu ventu ‘i raggi ci sminuzza.

Ma st’annu prima chi vutau strata,
chi cosi beddi vitti ‘a terra mia;
purtaru, cca, ni niatri la “regata”,
di tuttu ‘u munnu ‘a genti la talìa.

‘Mpupata a festa comu ‘na spusina,
aperta ogni finestra o finistruni;
sfilavanu li varchi a la marina,
cuntenti li migghiara di pirsuni.

Pi junta, Garibaldi assunnacchiatu,
cu l’occhi ancora misi a pampinedda,
talìava sturduteddu e frasturnatu
sintennu ciuciuliari ogni vanedda.

Pi Trapani fu certu un granni vantu,
st’eventu ‘naspittatu e purtintusu
e tutti cuntintuna ‘un sacciu quantu,
la luna chi taliava di dda susu.

Fàuci, chi d’‘u mari si vagnata,
nun farlu arrimuddari stu culuri;
di tuttu ‘u munnu essennu ammintuata,
rigina di lu Sali e di li ciuri.