CHITARRA STUNATA

Nta ddu saluni russu tappizzatu
cu tanti seggi misi a filanera
s’assetta commiru ogni deputatu,
ognunu o latu di la sò bannera.

Lu capu mmezzu comu l’indiani;
tutti su’ pronti beddi assistimati,
cumincianu a fari li ciarlatani
e di dda nescinu li megghiu scinati.

Ognunu s’addifenni li sò fatti,
taliannusi cu sdegnu occhi ntra l’occhi
s’aggarranu nfiruciti a cani e gatti
facennu un tiatrinu, sti pinocchi!

Enùtuli a sunata è sempri a stissa:
si fannu li cunti a favuri d’iddi,
di facci e facci pigghianu pi fissa
sti granni ciriveddi di scarziddi.

Arrimuddati sti tistazzi duri
giusta virità iti a cunfissari,
cu cori dati l’arma a lu Signuri,
L’Italia… facitila cantari!