CHI SCURU CHI FA

Amara terra, di sangu abbivirata,
sta canniledda chi ni facia allustru
di li dannati a lampu fu astutata,
p’un darici sensu a l’onuri nostru.

Lu marranzanu accorda stu lamentu
di cu li chianci e li voli beni,
sparsa la vuci fu purtata o ventu
e l’ammarizzi cu l’avi si li teni.

Sta giuvintù ch’è mmezzu di li guai,
nun c’è cchiu nuddu patri chi ci pensa,
di cosi torti ci nni sunnu assai,
si persi firi e puru la pacenza.

Si persiru cu iddi li spiranzi
nun ci pò cchiu né Dio né li Santi,
li porci pensanu a ghinghisi li panzi,
l’arma ci feti e portanu li guanti.

Chianci Sicilia mmezzu di stu nfernu,
porta lu luttu cu nivuru velu,
mi chianci lu cori comu fussi mmernu
e supra d’iddi chianci anche lu cielu.

Ma st’omini sunnu ccà nun s’inneru,
lassaru ntra sta terra la simenza
pi spannila prestu pi lu munnu nteru,
pi struriri dda gran fauci cull’urgenza.