DEDICATO A MODUGNO

Manu manuzza cu lu tramuntu isti
lassannu stu tò beddu paraddisu,
vulannu vulannu nfinu ncelu iungisti
cu l’arma leggia senza nuddu pisu.

Tutta la notti ti vigghiau ddu mari
dunni lavavi la tò sita peddi,
silinziusi stesiru li lampari,
all’alba nun cantaru mancu aceddi.

Chiangi cu pena chiangi u pisci spata
di lu valuri datu a dda svintura
cu dda gran vuci di la tò cantata
eri ascutatu puru di li mura.

A tia, siculu mari di villutu
cu scogghi tutti ntunnu a curuna,
prima spirari stu tò nnamuratu,
cu l’occhi fici l’ultima canzuna.