|
La cummari di la za Nedda
purtava mantella, visit, e unnedda.
Lu maritu di la za Nzina
nta lu cileccu rilogiu e cantina,
la muggheri cosetti cuttuni
e li scarpi cu lu buttuni.
Lu zitu passatu di Betta
purtava scarpi cu la puntetta
avìa sempri la facci russa
picchì manciava pasta chi trussa
e siccomu era malarucatu
di la so zita fu lassatu.
Tutti li donni e puru a za Nina
mutanni longhi cu la puntina,
la figghia di lu zu Nzinu
vesta sutta e spulvirinu,
la nanna ntesta un mirriuni
e si quariava cu lu cufuni.
Lu zu Cicciu ja arripizzatu
e pi cinta un lazzu attaccatu,
mentri lu burgisi benistanti
causi villutu, fascia e tiranti.
Nofriu avìa un strittu uppuni
e si lu chiuria cu lu spinguluni.
Lu zitu di donna Ninetta
a fari 1‘orariu c’ja ca scupetta,
prestu si la vosi maritari
picchì sapìa bona arripizzari,
iddu purtava scarpuna ntacciati
cu li zambitti agghiummuniati.
Lu zu Gnaziu lu lattaru
di mmernu purtava lu scapularu
e pi lu friddu li so’ patruna
supra li spaddi li fazzittuna,
facìa scantari don Mariolu
quannu avia misu lu finniòlu.
La so’ zita si chiamava Ntunietta
e sapìa fari la bedda quasetta,
si maritaru di capu matina
idda avìa misa nna vesta trucchina
e pi velu avìa ntesta la zita
nna cuvaida tutta di sita.
La niputi di la za Marianna
si maritau cu unu di campagna,
si lu pigghiau cu amuri e affettu
picchì purtava la mula e u carrettu,
idda purtau dui addizzi e durani
e sapia fari la pasta e lu pani.
Turi pigghiau a figghia da za Tana
e ci purtau li matarazzi di lana,
si la maritau cu tanta primura
picchì era veru sparagnatura,
si la pigghiau bedda grossa
accussì un tuccava ossa.
Li figghi di lu zu Caloriu
eranu setti frati e ddu soru
e si li ziti li vulianu vasari
cu la lupara l’ajanu ammazzari
picchi sti frati eranu gilusi,
sciarreri, linguti e mafiusi.
Li gemelli avìanu pettu beddu
picchì purtavanu lu pittaleddu,
dui minduzzi li ucchiaru
eru nto patri e si spiegaru,
di sti ziti eranu priati
picchi facianu ddu soru e ddu frati.
Mischinu, ddu scarsu di Adu
si maritau cu lu vistitu mpristatu
e la zita tutta cuntenti
di stu fattu nun sapìa nenti,
si nn’addunau la notti a za Fila
chi nun avìa mancu causi tila.
Rosa pigghiau a lu signurinu
cu paglietta e bastuncinu,
era un riccu pussirenti
era anticchia deficenti,
ntra lu pettu idda avìa lu focu
picchì ci purtava la casa e lu locu.
Lu figghiu di la za Nolfa
dunni iddu ja ci davanu a coffa
picchì era veru mbriacuni
macaruru e vilantruni,
stava sempri cu la panza a lu suli
e si stricava comu li muli.
Fifì si la pigghiau di lu cummentu
e ci rigalàu un gran finimentu,
idda purtava du beddi trizzi
bianca, biunna e di rari biddizzi,
longa quantu nna bannera
sta zita di Fifì bedda e sincera.
Lu maritu di la za Jaca
pi giacca avìa misa la bunaca
ntra li sacchetti la spisa purtava
comu gibberni l’ammuttunava
e li sordi ntra la sacchittedda
rapia e chiurìa cu la curdedda.
La figghia di la za Cicca
era pilusa e sicca sicca
e pi fari fiura tinìa misi
setti suttani e quattru cammisi,
pi maritalla nun sapìa comu fari
e sò patri ci misi u sinsali.
Liddu pigghiau a Ninetta
chi purtàu cappeddu cu viletta,
mastru bonu stu don Liddu
e satava comu n ariddu,
sta zita tutta sapìa fari
sapìa cusiri e raccamari.
Mentri sò cuscina Ada
avìa ncasa nna fìgghia pigghiata,
di maritalla nun viria l’ura
picchì era nfastica e macarura,
tuttu pisava cu la balanza
e ci arristàu supra la panza.
La fìgghia di cumpari Blasi
s’ja a vasari darrè li casi
cu lu fìgghiu di donna Lora
e si curcavanu nta pagghialora,
patri e matri n’eranu cuntrari
e tutti dui pinsaru di scappari.
Lu vecchiu assittatu nna siggitedda
nt’aricchia purtava a ciccedda,
tinia ncumannu la za Pippina
e la ruspigghiava prestu a matina,
maritu e muggheri tutti dui
si dicianu tannu di vui!
GLOSSARIO:
FINNIOLU____ - Mantello a doppia ruota
FAZZITTUNI__ - Plaid a quadri
IJPPUNI_____ - Giacchino stretto
BUNACA______ - Giacca con grosse tasche
MUCCATURI___ - Fazzoletto
SCAPULARU___ - Mantello con cappuccio
FINIMENTU___ - Tre pezzi completi oro
CURVAIDA____ - Sciarpa di seta
CILECCU_____ - Gilé
VISIT_______ - Busto affermato a vita
UNNEDDA_____ - Gonna lunga a cinto con la tasca dentro
PITTALEDDU__ - Reggiseno
MINZUDDI____ - Gemelli
CAUSI TILA__ - Mutande da uomo
ZAMPITIE____ - Strisce di stoffa per avvolgerli nei piedi
MURRIUNI____ - Fazzoletto avvolto a giro testa
TARI’_______ - Soldi antichi
|
e-mail -