LU STRATTU

Ancora mi ricordu, quannu nica iu era,
me’ nanna chi passava a la scumera
lu pumaroru russu e tuttu asciuttu
prontu pi ffari lu beddu strattu.
Dintra lu tavuleri lu stinnia
e tuttu ntunnu lu sali ci mittia,
stinnennula all’occhiu di lu suli
la riminava comu lu spiziali.

Cu lu suli dda sarsa si cucia
e accussì mancu un quartu s’arridducia;
e ddoppu ch’era bedda asciucata
si passava a essiri cunsirvata.
Di lu strattu nna baddottula facia
e dintra un cantareddu lu mittia,
poi vagnava nna pezza china d’ogghiu
pusannuccilla supra pi commogghiu.

Pi lu sucu bastava nna pizzicata,
niscia ciavuru di dda pignata!
Àiu lu spinnu, e mi nni manciassi un piattu,
di ddu sucu fattu cu lu strattu.