LU STAZZUNARU

Ivi o stazzuni di Mommu Palermu
ivi accattari nna quartara e un lemmu,
stu stazzunaru fa cosi beddi e ‘un sgarra:
pignati, piatta, cannateddi e giarra.

Sti cosi beddi su’ fatti cu la crita
travagghiata cu l’acqua e cu li dita,
nescinu casirì, cufuna e cannileddi,
sciaramiri, bummuli e lanceddi.

Di li sò manu nescinu scultura
chi poi li nfurna dannuci cuttura,
travagghia st’artigianu cu valuri
pi tuttu chiddu chi pò abbisugnari.

Mannamu fora sti gran cosi antichi
fatti pi li granni e pi li nichi,
nna cosa capricciusa e originali
lu forasteru sa quant’è chi vali.

C’è cu s’accatta puri lu murtaru
e vannu e vennu di lu stazzunaru.
Cosi priziusi ntra la valiggedda
pi ricordu di la Sicilia bedda.