LU PISTA PISTA DI LA RACINA

Manu manu la ìanu vinnignannu
ntra lu gibbiottu la ìanu scaricannu,
tannu nun c’era macina né cantina
si ia pistannu cu li peri la racina.

S’attacavanu ncoddu un muccaturi
p’asciucarisi mischini li sururi,
e c’un paru di scarpuna ntacciati
si facianu li megghiu abballati.

Mentri chi la ìanu pistannu
lu mustu di lu cannolu ia niscennu,
quannu poi si inchia lu tineddu
ntra la utti già vugghia lu vineddu.

Li arzuna si viriano la vista
di la racina lu pista-pista.
Sempri pensu a ddu munnu variu
chi a la vinnigna facia di scinariu.