LA FAMI NTO MUNNU

A soccu si viri nta la televisione
mpettu veni na gran cunfusione,
ddi mischineddi cu l’ossa affacciati
morti di la fami nterra ittati.

Perciò cu avi ncasa l’abbunnanza
circassi aviri misura e balanza,
nun s’abbuffari nfina all’ultimu ciatu
pinzannu puru pi ch’unna’ mangiatu.

Iu tegnu la spiranza nta lu cori
chi ci fussi fratillanza e amuri
mittennu sti santi valura in attu
pi riparari lu dannu chi s’à fattu.

Quannu n’assittamu pi mangiari
nun scurdamu a Diu ringraziari,
priamulu cu cori prufunnu
nun essicci cchiù fami nta lu munnu.